Tralo descanso do verán, o Entroido de Cobres retomou a súa axenda en Santiago de Compostela e Lisboa, e para rematar o ano viaxou ata Salceda de Caselas.
A primera cita despois das vacacións foi o 7 de setembro en Santiago de Compostela onde como cada ano participamos no Desfile de Entroidos Tradicionais de Galicia que organizou a Xunta de Galicia. O Entroido de Cobres recorreu as rúas de Santiago de Compostela comezando e rematando na praza do Obradoiro onde miles de turistas puideron gozar das actuacións dos diferentes grupos convocados.
O 21 de novembro recalamos en Lisboa, para o XVI Desfile Internacional da Máscara Ibérica, onde estiveron representados grupos de España, Portugal, Grecia e Italia, cun total de 32 grupos participantes.
Dende a praza do Município seguindo pola Rua da Prata e Rossio, para volver á praza do comenzo, a máis grande e importante de Lisboa, onde miles de turistas se atoparon con esta explosión de cores, música e baile.
E para rematar o ano, fomos ata Salceda de Caselas o 28 de decembro, ao VI Encontro de Ranchos e danzas tradicionais, para acompañar aos nosos compañeiros do Entroido Rancho Tradicional A Feira. Houbo espazos de encontro entre os grupos participantes, e o Entroido puido bailar na carpa belamente iluminada debido ás festividades de nadal.
