Desfiles, concursos, gastronomía, bailes e animación conforman un intenso programa para unha tarde de Encontro de Entroidos en Riomaior
Entroidos tradicionais chegados desde diferentes puntos de España e Portugal déronse cita esta fin de semana en Vilaboa, concretamente en Riomaior, no marco do VI Encontro de Entroidos, do que Cobres será un ano máis anfitrión.
Máis de catrocentas persoas se desprazaron a Vilaboa para formar parte dunha iniciativa que busca dar visibilidade e poñer en valor o patrimonio inmaterial e cultural que representa cada un dos entroidos asistentes, transmitindo tradicións seculares a través da vestimenta, baile, música e o concepto de entroido identitario de cada comarca.
A cita foi este pasado sábado, 13 de xullo. E ata Vilaboa desprazáronse por primeira vez o Entroido de Igüeña, que viu dende León: Las burras de Tremor de Arriba y El toro de Espina de Tremor. Para eles foi a primeira actuación no evento, que estivo seguida doutros entroidos xa habituais neste Encontro como os Caretos de Lazarim, de Lamego en Portugal; ou os Caretos de Arcas, que veñen de Macedo de Cavaleiros, na Braganza. A estes tamén se uniron os Guirrios e Madamitas de Cimanes del Tejar.
Cantabria estivo representada co entroido Andruido en la Paré de Piasca e Zamora, co Atenazador de San Vicente de la Cabeza. A nivel galego, dende Salceda de Caselas, veu o Rancho Entroido da Feira e dende Ponteareas, Perriñas e Mudados de Ribadetea. Tamén estiveron en Vilaboa os Xenerais da Ulla, un entroido veciño da comarca do Ulla, así como as Madamas e Danzantes do Entroido de Salcedo, que se achegaron nesta xornada dende A Pobra do Brollón, en Lugo.
O Encontro arrancou o sábado poñendo en común vivencias. Foi ás 12 da mañá co Vermut de Entroidos, no Chiringo Deilán, onde se puido gozar dun ambiente animado á beira do mar. Mentres tanto, a apertura oficial do encontro tivo lugar ás 18:15 horas, seguida dun espectacular desfile e actuación dos diferentes entroidos ás 18:30 horas. Co solpor, ás 21.30 horas, tivo lugar unha cea amenizada con música, dando paso á actuación DJ’s Encontro a partir das 23.30 horas, garantindo a diversión que merecía esta especial ocasión.
A cativada tamén foi protagonista neste evento xa que tras o pistoletazo de saída da tarde, os inchables estiveron dispoñibles ata ao inicio da cea. Ademais, houbo un mercadiño de artesanía e pezas de segunda man para adquirir distintas prendas e obxectos, así como a exposición de pinturas “Que é o Entroido de Cobres para ti?”, que se celebrou por primeira vez este ano, un concurso no que participou a poboación máis cativa dende infantil ata secundaria.
Peche do evento
Este evento, organizado pola Asociación Cultural Cobres coa colaboración do Concello de Vilaboa, pretende non só manter viva a tradición dos entroidos, senón tamén promover a cultura e o seu valor entre as novas xeracións. A xornada estivo chea de cor, música, gastronomía e, sobre todo, moita diversión, ao que contribuíu a presenza da influencer @letidataberna. Para rematar o día, entregouse un agasallo aos participantes e os premios do concurso de pintura. A amenización da cea estivo a cargo do grupo Fanfarria Furruxa, que deu paso aos DJ’s que actuaron a continuación, comezando aproximadamente ás 23:30 horas con Dj Charlie e de seguido, Dj Ekix, Dj Roy e Dj Gabry.
