Danzarán en Santa Marta, Alcouce e Postemirón pola mañá e en Paredes e As Salinas pola tarde.
Madamas e Galáns prepáranse para o inicio do Entroido de Cobres, a festa máis agardada en Vilaboa, e arranca mañá cunha presentación polos barrios que levará a comitiva do Entroido a percorrer, desde as 11 da mañá, os barrios de Santa Marta de Bértola e a praza do Alcouce en Figueirido, continuando ás 13:00 h en Postemirón. Xa pola tarde, danzantes e músicos trasladaranse ás 16:00 h á estrada vella de Paredes para rematar unha hora máis tarde nas Salinas de Ulló.
Un código QR, ao que se pode acceder desde a web entroidodecobres.es, permitirá localizar en tempo real a Madamas e Galáns, facilitando así a integración na programación tanto nesta primeira xornada do Entroido como nas actividades que se desenvolverán do 1 ao 4 de marzo. A mesma páxina web ofrece tamén información sobre a oferta de restauración en Vilaboa. Restaurantes, tascas, furanchos, cafeterías e taperías son unha opción ideal para descubrir a gastronomía local ao son do Entroido.
A Asociación Cultural Cobres, organizadora do Entroido coa colaboración do Concello, destaca o forte arraigamento popular que esta festa ten en Vilaboa, especialmente en San Adrián e en Santa Cristina, parroquias nas que ser Madama ou Galán é un honor, ás veces herdado por tradición familiar e noutras adquirido para cumprir un soño que non puideron acadar xeracións anteriores.
Así o senten Sara Gómez e Rafa Malvar, parella de baile como Madama e Galán, que aseguran que os seus traxes teñen un “valor sentimental incalculable”. A ela o primeiro prestáronllo e despois conseguiu un propio, que cada ano vai modificando, mellorando e personalizando. Porque esa é outra singularidade dos traxes do Entroido de Cobres: non hai dous iguais, aínda que todos cumpren os mesmos parámetros estéticos. O de Galán é máis sinxelo, con menos lazos e brillos, e Rafa Malvar quixo personalizalo cun pavo real e unha bolboreta no sombreiro, e uns lazos co ano 2015 —cando comezou a bailar— e outro co seu nome.
