Converterán a carpa nun espazo de diversión satírica ataviados con complementos que oculten a súa identidade e lles permitan facer trasnadas.
O Entroido de Cobres está cheo de rituais e tradicións conservadas ao longo dos séculos e transmitidas de xeración en xeración ata chegar á edición actual, na que os danzantes contaxian o orgullo de seren gardiáns e portadores dun patrimonio cultural convertido en sinal de identidade para todo o municipio de Vilaboa.
Tras unha xornada dominical soleada, o Entroido de Cobres encara a súa terceira xornada, na que os maghachos recollerán o relevo dos danzantes e, xa na carpa, durante a festa nocturna, converteranse nos auténticos protagonistas. Trátase de persoas anónimas, ocultas tras máscaras ou complementos e ataviadas con roupa que oculta a súa identidade, que no luns de Entroido están autorizadas a facer trasnadas. Escollen as súas vítimas na propia carpa e sométenas a bromas e escarnio, procurando sempre non seren recoñecidas.
As persoas máis maiores lembran esta xornada dos maghachos como unha das máis divertidas para aquelas que non podían ou non foran elixidas para formar parte das parellas de madamas e galáns. Mentres mozos e mozas seleccionados pasaban o ano confeccionando os seus traxes, cos laboriosos sombreiros cheos de flores e cristais que simbolizan un ritual de benvida á primavera, as demais persoas argallaban unha noite de diversión satírica intimamente ligada ao espírito do entroido en Galicia.
Na véspera do día grande da programación, xornada festiva en Vilaboa, a festa prolongarase ata ben entrada a noite coa Orquestra Fuego e o Dúo Prisma.
