A creadora de contido en galego garante diversión na tarde da Corrida do Galo con xogos populares que serán presentados polo televisivo ISI.
O Entroido de Cobres encara o seu día grande cunha xornada cargada de actividades e tamén de tradicións, nalgúns casos actualizadas. A Asociación Cultural Cobres, responsable da organización da festa, mantén intacta a estrutura e o sentir do Entroido tal e como chegou aos nosos días mediante a transmisión oral de xeración en xeración.
Na edición do ano pasado, o Entroido de Cobres recuperou a figura do predicador, historicamente encarnada por un home e desaparecida nas últimas décadas, deixando este personaxe en mans da creadora de contido en galego Leti da Taberna.
A tradición indica que, despois da Corrida do Galo, o predicador lanzaba o “Sermón do Galo”, así como críticas mordaces en verso contra os vicios da veciñanza. Este personaxe tiña que andarse con ollo, pois o público podía responder movendo o palco e incluso chegando a botalo abaixo.
Leti da Taberna, que repite como predicadora por segundo ano consecutivo, non corre ese risco. As miles de persoas que seguen diariamente a esta creadora de contido en galego nas súas redes sociais foron un factor importante nesta elección, mais tamén o foi a defensa constante que @letidataberna fai do patrimonio inmaterial galego, da nosa cultura e das nosas tradicións.
Chegará a Riomaior disposta a garantir diversión, e asegura que as súas coplas estarán cargadas de retranca, animada pola calorosa acollida que Vilaboa lle brindou o ano pasado.
Ademais de rebuscar nas novas do concello para darlle actualidade ao seu contido, tamén ultima o testamento do galo: “voulle facer as partixas a ver se non se me enfada ninguén”.
Será sen dúbida unha das actuacións principais da tarde de mañá en Riomaior, que comezará ás 16.30 h con xogos e a Corrida do Galo, presentada por ISI da TVG. O Entroido de Cobres subirá ao escenario en tres momentos diferentes da tarde, e haberá Galo no río e Galo na vara, para rematar coa Queima. A Fanfarria Furruxa encargarase de amenizar o recinto e a velada rematará con DJ Gabry.
Na xornada de hoxe, o Entroido continuou o seu percorrido polas parroquias de Cobres.
