Xogos populares, concurso de disfraces, a queima do galo e a predicadora Leti da Taberna poñen fin á festa de Cobres.
A carpa de Riomaior acolle desde o mediodía unha intensa programación que pon o ramo ao Entroido de Cobres. A xornada comezou cunha sesión vermú e continúa ás 16.30 horas cos xogos populares, entre eles o do galo no río ou o galo na vara, nos que os participantes deberán demostrar a súa habilidade para non caer ao cauce do río Maior. Esta primeira parte lúdica culminará coa Corrida do Galo, protagonizada por un animal sintético que acabará queimado ao final do día. As persoas gañadoras en cada categoría recibirán un premio de 100 euros.
A encargarse de dinamizar a tarde estará ISI, coñecido presentador da TVG, que animará ao público a participar nestes xogos cunha tradición tan antiga como o propio Entroido de Cobres, no que as madamas tiñan historicamente a responsabilidade do sacrificio do galo, o que dá mostra do importante papel das mulleres nesta celebración popular.
O xurado valorará os disfraces para premiar ás mellores propostas nas categorías infantil, individual e de grupo, cunha dotación económica de 50 e 100 euros. Os premios entregaranse xunto aos do Concurso do Testamento Infantil, o sorteo dos lotes doados por Aceites Abril e os galardóns das distintas probas lúdicas.
E haberá danza. Madamas e galáns ofrecerán tres intervencións ao longo da tarde, e o grupo das Veteranas subirá ao escenario en dúas ocasións para presentar a súa Danza das Espadas, antes da queima do galo e da lectura do seu testamento a cargo de Leti da Taberna, cunha retranca galega que cada día suma máis seguidoras e seguidores nas redes sociais. No seu papel de predicadora, repasará a actualidade local facendo mofa do número de rotondas deixadas no municipio polo macronó da A-57 ou convidando ao alcalde a inaugurar o futuro auditorio ao aire libre de Figueirido cunha actuación súa, ademais de incluír referencias á actualidade galega e estatal.
A tarde rematará cunha importante sorpresa preparada con moito agarimo pola Asociación Cultural Cobres e por toda a familia do Entroido de Cobres.
Esta mañá concluíu o percorrido polas parroquias coa visita a Sobreira, A Cardiña e Paradellas.
