A Asociación Cultural Cobres e o Concello agradecen o apoio e colaboración de C. Tangana, Little Spain e do RC Celta.
O Entroido de Cobres puxo onte o ramo á edición 2025 coa presentación do seu Himno de Cobres, seguido por máis de 3.000 persoas a través das pantallas xigantes instaladas na carpa de Riomaior durante o día grande da festa.
Inspirado na peza do centenario do RC Celta, o videoclip presentado pola Asociación Cultural Cobres parte da base de A oliveira dos cen anos, coa autorización do seu autor C. Tangana e da súa produtora Little Spain, ás que tanto a Asociación como o Concello de Vilaboa agradeceron publicamente a colaboración, así como tamén ao RC Celta de Vigo.
Gravado en espazos emblemáticos de Vilaboa como As Sainas, o Forno do Cal, o parque de Riomaior ou as bateas do litoral, a adaptación da letra transmite a fonda vinculación da veciñanza co seu entroido, que se define como “máis ca un sentimento: é unha forma de vivir”. A letra expresa a ilusión coa que se organiza a festa durante todo o ano e o desexo de que o martes de Entroido non remate nunca.
O vídeo é unha declaración de amor ao Entroido de Cobres e enmárcase no traballo conxunto da Asociación e o Concello para protexer e poñer en valor este patrimonio cultural, un recoñecemento que tamén se estendeu a Antón Álvarez.
Dirixido pola Asociación Cultural Cobres e producido por Peixe Globo Ideas e Álvaro Carballo, contou coa colaboración do músico pontevedrés e mestre da banda de gaitas Marcelo DoBode. No audiovisual participaron madamas, galáns, veteranas e veteranos do Entroido de Cobres, así como integrantes de Aires de Cobres. A organización agradece especialmente a María Esther Castro pola cesión da súa batea para a gravación, e a Pablo Castro (Nano Competición) polo coche insignia do Entroido.
Balance en cifras
Máis de 3.000 persoas participaron nas actividades do martes grande, esgotando existencias nos postos de comida. Os catro días do Entroido de Cobres deixan cifras que reflicten o intenso traballo da Asociación Cultural Cobres e do Concello de Vilaboa para promocionar unha festa que aspira a ser a primeira do entroido na provincia de Pontevedra declarada Festa de Interese Turístico Nacional.
Nesta edición, o Entroido conseguiu visibilidade nas principais cadeas de televisión e emisoras de radio do país.
Entre as accións destacadas da edición 2025 están:
- O lanzamento da páxina web oficial.
- Un código QR que permitiu localizar en tempo real a comitiva de madamas e galáns.
- Uns perfís en redes sociais con seguimento en directo das actividades.
As redes sociais foron clave: máis de 80.000 contas foron alcanzadas en Facebook e Instagram. A promoción asociada á festa inclúe tamén a oferta de gastronomía e aloxamento local, un eixe de traballo que a concelleira de Promoción Económica, Carmen Gallego, ten como obxectivo reforzar.
O éxito do Entroido tamén se debe á implicación directa das familias das máis de 70 madamas e galáns, que percorreron a pé máis de 60 quilómetros en catro días, dedicando máis de 32 horas ás danzas para chegar a todos os barrios.
A continuación, un resumo do Entroido de Cobres deste ano 2025!
Antes da festa, o labor inclúe meses de ensaios, elaboración de traxes e promoción, xa que o Entroido de Cobres está presente todo o ano en encontros culturais. De feito, estará o vindeiro domingo en Cuntis.
