A Asociación Cultural Cobres, entidade sen ánimo de lucro, con CIF G36128296 e domicilio na Casa da Cultura de Riomaior, San Adrián de Cobres, 36142 Vilaboa (Pontevedra), convoca un concurso de manualidades en familia “ENTROIDOS TRADICIONAIS” enmarcado no seu VII Encontro de Entroidos que terá lugar o 12 de xullo do presente ano 2025 e organizado coa colaboración do Concello de Vilaboa. A continuación, establécense os requisitos de participación no mesmo.
1º.- Requisitos dos/a participantes.
- Ser estudantes no curso 2023 – 2024 nas etapas de educación de infantil, primaria ou secundaria.
2º.- O tema sobre o que versarán os traballos será os Entroidos Tradicionais.
Os traballos serán orixinais e inéditos.
Non se admitirán traballos que teñan contidos políticos, irreverentes, obscenos, xenófobos ou calquera outro que atente contra a dignidade das persoas.
3º.- O concurso estará dotado do seguinte premio.
- 1º premio 100€ + gorra
- 2º premio 50€ + gorra
- 3º premio 25€ + lote de calcetíns e imáns entroido
- 4º premio lote de calcetíns e imáns entroido
- 5ª premio lote de calcetíns e imáns entroido.
Os premios serán entregados o 12 de xullo durante o VII Encontro de Entroidos.
4º.- Forma de participación.
A participación é gratuíta, e será necesario realizar as seguintes accións:
- A manualidade realizada deberá ter por detrás o nome e apelidos do neno-a, e o Entroido ao que fai referencia a obra e un teléfono de contacto.
A manualidade poderá ser realizada en familia con calquera técnica que permita facer unha réplica dalgunha das pezas dun Entroido Tradicional a elixir entre os moitos que hai en España, Portugal e incluso doutros lugares do mundo.
5º.- Prazo de participación.
Entregaranse as manualidades na Biblioteca de Riomaior en horario e 8:00 a 14:00 horas do 7 ao 10 de xullo.
6º.- Valoración das obras.
As obras serán valoradas en relación cos seguintes criterios (cada criterio será valorado entre 1 e 5, sendo 5 a mellor valoración):
- Adaptación á temática.
- Orixinalidade.
- Dificultade técnica.
- Utilización de materiais reciclados.
O xurado estará formado por 3 membros, 2 da Asociación Cultural Cobres, 1 do Concello de Vilaboa.
Os-as gañadores-as serán anunciados no VII Encontro de Entroidos que terá lugar baixo o viaduto de Riomaior o 12 de xullo do presente, séndolles entregados os premios nese mesmo instante.
7º.- Autoría e difusión
As manualidades terán a autoría identificada, e serán expostas todas elas durante a celebración do VII Encontro de Entroidos para que todas as obras participantes poidan ser admiradas polos asistentes ao evento.
Os-as participantes autorizan expresamente á Asociación Cultural Cobres, para a utilización con fins publicitarios e de promoción, do seu nome e imaxe en calquera medio e material publicitario, así como das súas obras.
8º.- Imprevistos e supostos excepcionais.
A Asociación Cultural Cobres poderá dar o concurso como deserto se ningunha das obras presentadas alcanza a calidade mínima para os membros do xurado nalgunha das categorías.
A Asociación Cultural Cobres resérvase o dereito a suspender, anular, prorrogar, recortar ou modificar o concurso por circunstancias de forza maior e/ou alleas a súa vontade. Chegado este caso, a Asociación Cultural Cobres non tería que xustificar a decisión e non se lle podería reclamar ningún tipo de responsabilidade, sempre de forma que non prexudiquen os dereitos adquiridos polos participantes.
A Asociación Cultural Cobres resérvase o dereito a substituír o premio citado por outro de características e valor similar. O premio entregado non será susceptible de cambio, alteración ou compensación a petición do/a/s gañador/a/s.
9º.- Protección de datos persoais.
Os datos persoais que sexa necesario recadar para a participación no Concurso serán tratados conforme ás normas establecidas no Regulamento (UE) 2016/679, do Parlamento Europeo e do Consello, de 27 de abril de 2016, relativo a protección das persoas físicas no que respecta ao tratamento de datos persoais e á libre circulación destes datos (Regulamento Xeral de Protección de Datos) e na Lei Orgánica 3/2018, de 5 de decembro, de Protección de datos persoais e garantía dos dereitos dixitais (LOPDGDD).
A recollida dos datos só se realizará para que ditos datos poidan ser incorporados a ficheiros titularidade da Asociación Cultural Cobres e tratados exclusivamente para a finalidade que se especifica nas presentes bases. Os datos obtidos a través das manualidades presentadas serán os mínimos imprescindibles para facer posible a participación no Concurso.
10º.- Aceptación das bases
A participación no concurso implica a aceptación das presentes bases na súa totalidade, reservándose a organización o dereito a modificar algunha delas en casos excepcionais, tal e como se cita no punto 8º.