A sétima edición do Encontro de Entroidos de Cobres, celebrada o sábado 12 de xullo, converteu unha vez máis o municipio de Vilaboa no epicentro das tradicións do Entroido da Península Ibérica, cunha programación que combinou cultura popular, música en directo, actividades para todas as idades e un ambiente de festa inesquecible.
O evento comezou ás 13:00 h no Chiringuito de Deilán, co vermú de Entroidos, celebrado ao mediodía, onde o público puido gozar dunha mostra viva das máscaras e rituais tradicionais destas agrupacións, con especial protagonismo para figuras como os Follateiros de Lobios, os Currumiños de Mos, os Merdeiros de Vigo ou os Guirrios e Madamitas de Cimanes de Tejar.
Xa pola tarde, os grupos desprazáronse ata a Casa da Cultura de Riomaior, onde ás 18:15 h deu comezo o desfile e as actuacións polas rúas. Ás 21:00 h, a Fanfarria Furruxa amenizou a cea popular, e ás 23:00 h celebrouse a Noite de Encontros, cunha festa multitudinaria protagonizada por Quinkillada, Boyanka Kostova e os DJ’s Encontro (DJ Charlie + DJ Ekix), que puxeron o colofón á xornada.
Durante todo o día estivo activo un mercado de artesanía e produtos locais, con propostas creativas e de proximidade, e celebrouse tamén o Concurso de Entroidos Tradicionais, recoñecendo o traballo, a autenticidade e a posta en escena das agrupacións.
O evento contou coa participación de 10 grupos de entroidos tradicionais procedentes de Galicia, León, Zamora e Portugal, entre os que se atopaban:
- Madamas e Galáns de Cobres (Vilaboa)
- Veteranos do Entroido (Vilaboa)
- Currumiños de Mos
- Xenerais da Ulla (Santiago)
- Follateiros de Lobios
- Fulións e Boteiros de Viana do Bolo
- Madamas e Danzantes do Entroido de Salcedo (A Pobra do Brollón)
- Guirrios e Madamitas de Cimanes de Tejar (León)
- Atenazador de San Vicente (Zamora)
- Caretos de Lazarim e Caretos de Arcas (Portugal)
A xornada contou cunha ampla participación interxeracional, confirmando o seu carácter multixeneracional, con actividades pensadas para todos os públicos: desde xogos para a cativada e mercado local ata unha noite de música e festa.
A voz da xornada estivo a cargo da xornalista e comunicadora Marci Varela, quen guiou con entusiasmo o desenvolvemento das actividades ao longo do día.
Desde a Asociación Cultural Cobres, organizadora do evento, destacan:
“Foi unha festa histórica que puxo en valor a diversidade e riqueza dos entroidos da península. Grazas aos grupos, ao público, ás institucións e a todas as persoas que o fixeron posible. Para o ano, máis!”
