O Entroido de Cobres vén de participar no prestixioso Festival Identidades, celebrado na localidade de Fonni, en Sardeña (Italia), entre o 2 e o 4 de agosto. Trátase dun encontro internacional de expresións culturais tradicionais que reúne a representación de festas e rituais populares de toda Europa.
Esta viaxe supón un fito histórico para a festa: é a primeira vez que o Entroido de Cobres sae da Península Ibérica, levando a súa identidade e tradición máis alá do ámbito galego e estatal.
A participación foi posible grazas á invitación da Associazione Urthos e Buttudos de Fonni, organizadora do evento, e á coordinación da Asociación Cultural Cobres, que asumiu a loxística do desprazamento e representación do Entroido.
A comitiva estivo formada por integrantes da banda Aires de Cobres, así como por madamas e galáns das parroquias de San Adrián e Santa Cristina. Moitas das persoas participantes sacrificaron o seu tempo persoal e contribuíron economicamente para facer posible esta representación, amosando unha vez máis o forte compromiso co patrimonio cultural da comunidade.
Durante o desfile polas rúas de Fonni, bailouse co ritmo característico do Entroido, vestindo os traxes tradicionais cos seus vistosos sombreiros e lazos decorados con elementos decorativos cosidos a man, e repartíronse folletos informativos entre o público para dar a coñecer a historia, os valores e a singularidade desta celebración, unha das poucas en Europa que non emprega máscaras.
A participación no Festival Identidades supón un paso importante na proxección internacional do Entroido de Cobres, recoñecido como Ben de Interese Cultural e Festa de Interese Turístico de Galicia, e reforza o seu papel como símbolo vivo da tradición galega.
Actividade cofinanciada pola Deputación de Pontevedra.
