O vindeiro sábado 6 de setembro de 2025, o Entroido de Cobres estará presente en Santiago de Compostela participando no Desfile de Entroidos Tradicionais de Galicia, organizado pola Xunta de Galicia. A cita terá lugar ás 12:30 horas na emblemática Praza do Obradoiro, diante da Catedral.
Este desfile reúne cada ano algunhas das festas máis representativas do entroido galego, ofrecendo un espazo de encontro e visibilización para as tradicións vivas do país. A comitiva do Entroido de Cobres estará formada por madamas, galáns e músicos da banda Aires de Cobres, que desfilarán co traxe tradicional e ao son da música da nosa festa.
Coa coordinación da Asociación Cultural Cobres, esta participación forma parte do traballo continuo de difusión e promoción dun entroido recoñecido como Ben de Interese Cultural e Festa de Interese Turístico de Galicia.
Podes consultar o evento completo na web da Xunta premendo aquí: CULTURA EVENTOS
