O Entroido de Cobres foi un dos protagonistas do I Encontro de Entroidos do sur de Pontevedra celebrado en Bueu o 8 de novembro de 2025.
Este evento reuniu por vez primeira os principais entroidos tradicionais da zona sur da provincia, cunha xornada que combinou reflexión e exhibición. A participación de madamas, galáns e músicos de Cobres reforzou a identidade cultural do concello de Vilaboa e a súa importancia dentro do mapa dos entroidos galegos.
Durante a mañá, celebrouse unha mesa redonda sobre as figuras emblemáticas do entroido, mentres que pola tarde tivo lugar un desfile polas rúas de Bueu, no que o Entroido de Cobres amosou o seu ritual, vestimenta e coreografías únicas, ante un público entregado.
A participación nesta iniciativa consolida o Entroido de Cobres como unha das festas máis recoñecidas e valoradas do patrimonio inmaterial galego, promovendo o seu coñecemento e continuidade.
