O Entroido de Cobres 2026 continúa enchendo as parroquias de Vilaboa de música, baile e tradición a pesar da choiva, protagonista en boa parte das xornadas da festa. O mal tempo non está a impedir que madamas, galáns, músicos e acompañantes manteñan vivo o espírito do Entroido, deixando algunhas das imaxes máis singulares desta edición.
Entre elas destaca unha escena xa convertida nun dos símbolos deste 2026: madamas e galáns bailando baixo a choiva protexidos con chuvasqueiros transparentes, unha iniciativa impulsada pola Asociación Cultural Cobres para facer fronte ás previsións meteorolóxicas adversas e protexer os delicados traxes sen renunciar ao desenvolvemento normal da celebración.
As elaboradas vestimentas do Entroido de Cobres, decoradas con flores, espellos, cintas e abalorios confeccionados artesanalmente, requiren un coidado especial ante a choiva. Por iso, os chuvasqueiros están a permitir preservar un patrimonio material no que as familias e participantes traballan durante meses, ao tempo que continúan os percorridos, os bailes e as visitas ás parroquias previstas no programa.
Pero a choiva tamén está a deixar unha estampa que moitas persoas identifican co Entroido de antano. En diferentes momentos destes días, as condicións meteorolóxicas están a favorecer que a comitiva recupere unha tradición histórica da festa: a entrada nas casas da veciñanza, onde madamas, galáns e músicos son recibidos para compartir un momento de convivencia, música e hospitalidade. Unha imaxe máis íntima do Entroido que lembra como se vivía a celebración décadas atrás, cando os fogares formaban parte esencial do percorrido festivo.
Lonxe de converter a choiva nun problema, bailaríns e músicos están a afrontar estas xornadas cunha gran dose de humor, retranca e ganas de festa, adaptándose ás circunstancias sen perder o sorriso nin as ganas de facer bailar á veciñanza. Entre bromas, improvisacións e moita complicidade, a auga está a converterse nun ingrediente máis dun Entroido diferente, pero igualmente memorable.
A pesar do tempo, o Entroido de Cobres mantén intacto o seu espírito festivo nunha edición histórica marcada ademais pola participación récord de 46 parellas de madamas e galáns, preto dun cento de participantes, converténdose nunha das edicións máis multitudinarias da historia recente da celebración.
A festa vivirá esta tarde unha das súas citas máis esperadas coa celebración da tradicional Corrida do Galo, o acto central do Entroido de Cobres, que terá lugar en Riomaior. Os xogos do galo, os bailes, a intervención do predicador e a queima final volverán reunir participantes, veciñanza e visitantes nunha despedida cargada de simbolismo para pechar unha nova edición dunha das festas tradicionais máis singulares de Galicia.
