O Entroido de Cobres 2026 puxo o seu broche final o pasado sábado 14 de marzo coa celebración da tradicional Morada do Entroido, unha xornada de convivencia que reuniu en Riomaior a participantes, veciñanza e persoas colaboradoras para despedir unha edición histórica da festa.
A Morada, xa consolidada como un dos actos máis especiais do calendario do Entroido de Cobres, serviu un ano máis como punto de encontro para compartir mesa, lembranzas e celebrar colectivamente o esforzo de todas as persoas que fan posible a continuidade da tradición máis representativa do municipio.
A xornada comezou ás 13:30 horas cunha sesión vermú, preludio dun ambiente festivo e familiar que continuou a partir das 14:30 horas co tradicional xantar de confraternidade, no que persoas asistentes puideron gozar dun menú composto por entrantes, carne asada con patacas, bebidas, sobremesa e café.
Durante toda a tarde non faltou a animación musical, nin tampouco os espazos pensados para os máis pequenos e pequenas, que puideron desfrutar de inchables, convertendo Riomaior nun lugar de encontro interxeracional no que o Entroido continuou vivo máis alá das datas oficiais da celebración.
A Morada supuxo tamén un momento para compartir anécdotas, lembrar os momentos máis especiais do Entroido de Cobres 2026 e poñer en valor unha edición marcada pola participación récord de 46 parellas de madamas e galáns, a estrea da nova peza “Riomaior”, a resistencia fronte á choiva e o éxito dunha programación que volveu encher as parroquias de Vilaboa de música, baile e tradición.
Con esta celebración, o Entroido de Cobres pechou oficialmente unha edición para a historia, reafirmando unha vez máis a forza dunha festa centenaria que continúa viva grazas ao compromiso da veciñanza, da Asociación Cultural Cobres e de todas as persoas que participan activamente na súa conservación e transmisión.
