O Entroido de Cobres viaxará o próximo sábado 21 de febreiro de 2026 ata Piasca (Liébana, Cantabria) para participar como grupo convidado no tradicional Carnaval de Piasca 2026, unha das celebracións máis singulares do norte peninsular, centrada na recuperación e posta en valor das tradicións do entroido e do patrimonio cultural inmaterial.
A participación do Entroido de Cobres formará parte dun amplo programa de actividades organizado pola Asociación Cultural “Andruido en la Paré de Piasca”, no que tamén participarán outras agrupacións e personaxes tradicionais de diferentes territorios do Estado, como El Atenazador de San Vicente de la Cabeza (Zamora) ou os Zamarrones de Los Carabeos (Cantabria), ademais de colectivos culturais e agrupacións musicais da comarca lebaniega.
A xornada contará con recepción oficial ás asociacións participantes, pregón do carnaval, actuacións culturais, música tradicional e diferentes actividades festivas ao longo do día. O Entroido de Cobres estará presente nos actos centrais e no gran pasarrúas das asociacións participantes polas rúas da vila de Potes, un dos momentos máis destacados da programación do carnaval.
Esta participación supón unha nova oportunidade para seguir difundindo e dando visibilidade ao Entroido de Cobres fóra de Galicia, compartindo espazo con outras manifestacións tradicionais e fortalecendo os vínculos entre celebracións populares que traballan pola conservación do patrimonio cultural.
📍 Lugar: Piasca e Potes (Liébana, Cantabria)
📅 Data: Sábado, 21 de febreiro de 2026
