O VIII Encontro de Entroidos de Cobres, que se celebrará o 27 de xuño en Vilaboa, xa ten pechado o cartel da súa esperada Noite de Encontros do Entroido de Cobres 2026, unha proposta musical pensada para prolongar a festa despois das actuacións dos entroidos tradicionais.
A música comezará a partir das 21:00 horas cun cartel que mestura espectáculo, clásicos festivos e sesións para todos os públicos.
Un dos grandes protagonistas da noite será Festicultores Troupe, unha das formacións máis coñecidas do panorama festivo galego. O grupo destaca polo seu humor, a interacción constante co público e unha posta en escena irreverente que converte cada concerto nunha auténtica festa colectiva.
A continuación subirán ao escenario The Tetas’ Van, unha banda coñecida polas súas versións de cancións populares e pola capacidade para facer cantar e bailar ao público cun repertorio divertido, dinámico e pensado para todas as xeracións.
A madrugada contará tamén cos DJ’s Encontro. Repite unha das figuras xa habituais nas festas do Entroido de Cobres, Gabry DJ, un clásico das celebracións de Cobres que volverá poñer banda sonora á noite.
Como novidade desta edición incorpórase La Yaya DJ, coñecida polas súas sesións eclécticas nas que mestura música de diferentes épocas e estilos, creando un ambiente festivo pensado para públicos moi diversos.
Con este cartel, a Noite de Encontros do Entroido de Cobres 2026 completa a súa programación musical e reforza unha proposta que combina patrimonio cultural, música e convivencia nunha das citas máis destacadas do calendario festivo de Vilaboa.
Toda a programación do VIII Encontro de Entroidos de Cobres pode consultarse na páxina web oficial e nas redes sociais do Entroido de Cobres.
