O presidente da Asociación Cultural Cobres, Martín Duarte, tamén galán do Entroido de Cobres organizado por dita asociación xunto ó concello de Vilaboa, estivo presente na II Xornada TEMPO DE ENTROIDO no coloquio “Patrimonio e Identidade”.
Xunto ó entroido de Xinzo de Limia e ao de Eiroás, Martín falou sobre a orixe do Entroido de Cobres, os seus rituai ancestrais e describiu os traxes e sombreiros de Madamas e Galáns, personaxes deste entroido ancestral de Galicia.
Coñecer a historia detrás dunha festa cultural de tal relevancia como o Entroido de Cobres ten especial importancia para a súa continuidade e para a recuperación de rituais e danzas antigas que co paso do tempo quedaron esquecidas, e que grazas ao boca a boca dos nosos maiores se dan a coñecer.
Esta II Xornada celebrada o 13 de xaneiro estivo organizada polo Entroido de Laza, a Asociación Cultural Enlazados e o Concello de Laza, a quen se agradece a invitación.
